Әлеуметтік желіде Жасанды интеллект вице-министрі Дмитрий Мунның “Үздік цифрландырушы” медалімен марапатталғаны туралы ресми құжаттың суреті тарады. Құжатқа Жасанды интеллект министрі Жаслан Мәдиев қол қойған.

Алайда желі қолданушылары шенеуніктің марапат алуына емес, құжат мәтініндегі тілдік қателікке назар аударды. Атап айтқанда, құжатта “наградталды” деген сөздің қолданылуы көпшіліктің наразылығын тудырды. Пікір білдірушілер бұл орыс тіліндегі “награждается” сөзінің тікелей аудармасы екенін айтып, қазақ тілінің әдеби нормасына сәйкес келмейтінін атап өтті.

Желі қолданушылары пікірлерінде: “Бұл қазақ тілінің талаптарына сай емес”, “Бұған дейін ‘грамота’ сөзінің ‘грамотасы’ деп аударылғанын да көргенбіз”, “Бұл — славян тілдеріне тән сөз, қазақ тіліне жат” деген сын-ескертпелер жазды.

Көпшілік министр қол қойған ресми құжатта мұндай қателіктің кетуіне қынжылыс білдіріп, мемлекеттік тілдегі құжаттардың сапасына жауапкершілікпен қарау қажеттігін алға тартты.