Риддер қаласында Даңқ обелискісіндегі Мәңгілік алауда тауық қуырып кеткен 31 жастағы жергілікті тұрғын ұсталды. Оқиға орнында түсірілген фото әлеуметтік желіде тарап, қоғамда үлкен резонанс тудырды. Тұрғындар жағдайға қатысты полицияға дереу шағым түсірген.

Полиция департаментінің хабарлауынша, жедел топ бейнебақылау камераларын қарап, куәгерлерден жауап алу арқылы құқық бұзушыны анықтады. Ол Әкімшілік кодекстің 434-бабының 4-бөлігі — «қоғамдық орындарды қорлау арқылы жасалған ұсақ бұзақылық» бойынша жауапқа тартылып, сот шешімімен 5 тәулікке әкімшілік қамауға жіберілді.

Полиция өкілдері тарихи ескерткіштер мен мемориалдарды қорлау ауыр құқық бұзушылық екенін, мұндай әрекеттер әкімшілік немесе қылмыстық жауапкершілікке әкелетінін еске салды.

Оқиға қоғамда қызу талқыланып, тұрғындар мемориал аумағына бақылауды күшейтуді, бейнебақылау жүйелерін реттеуді талап етуде.