Алматыда полицейлер әлеуметтік желіде қауіпті пікір қалдырған жас жігітті ұстады. Ол діни бірлестіктер қызметіне қатысы бар ұйым туралы пікірталас астына «Жарылуы тиіс орын» деген мазмұндағы пікір жазған.
Қауіп туралы ақпарат бірден «102» қызметіне жолданған. Экстремизмге қарсы күрес басқармасының мамандары қысқа уақыт ішінде жазба авторының жеке басын анықтады. Ол - 2004 жылы туған Алматы тұрғыны. Жас жігіт ұсталып, әрі қарайғы тергеу амалдары үшін полиция бөлімшесіне жеткізілді.
Алматы қалалық ПД экстремизмге қарсы күрес басқармасының бастығы Асхат Даулетияровтың айтуынша, интернеттегі кез келген қауіп төндіретін сөз - «әзіл» түрінде болса да - қоғамның қауіпсіздігіне нақты қатер ретінде қарастырылады.
«Мұндай хабарламалардың әрқайсысы мұқият тексеріліп, заң аясында тиісті шаралар қабылданады. Қауіпсіздікке қатысты ешқандай жеңіл-желпі қарауға болмайды», - деді ол.
Полиция азаматтарды әлеуметтік желілерді жауапкершілікпен пайдалануға, қатер төндіретін немесе заңға қайшы пікірлерге жол бермеуге шақырды.
Айта кетейік, бұған дейін Алматы әуежайында ұқсас жағдай тіркелген еді. 18 жастағы шетелдік жолаушы багажы туралы әзілдеп, ішінде «атом бомбасы бар» деп айтқан. Бұл үшін ол ұсақ бұзақылық бойынша әкімшілік жауапкершілікке тартылды.
DALAMEDIA admin
14
0