Елімізде «Педагог мәртебесі туралы» заңға елеулі өзгерістер енгізіледі. Жаңа түзетулер мұғалімдерді оқу процесіне қатысы жоқ қосымша міндеттерден босатып, негізгі миссиясы - білім беруге толық көңіл бөлуге мүмкіндік береді.

Мәжіліс депутаты, бұрынғы Білім министрі Асхат Аймағамбетовтың айтуынша, енді мұғалімдер қағаз және электронды түрде бірдей есеп беруге міндетті болмайды - барлық деректер тек бір рет енгізіледі. Сондай-ақ ұстаздарды әлеуметтік желіде парақша жүргізуге, сабақтан фото немесе видео жариялауға мәжбүрлеуге тыйым салынады. Ата-аналармен және оқушылармен байланыс тек ресми білім беру платформалары мен электронды пошта арқылы жүзеге аспақ. Яғни түнгі чаттар мен бітпейтін хат алмасуларға нүкте қойылады.

Жаңа заң жобасы педагогтардың жауапкершілік шекарасын нақты айқындайды: ұстаздар енді оқушылардың мектептен тыс мінез-құлқына жауап бермейді. Құжатта «бейтарап функциялар» ұғымы алғаш рет енгізіліп отыр. Яғни сабақ беруге тікелей қатысы жоқ тапсырмалар мұғалім міндетіне кірмейді.

Сонымен қатар, мектеп, ата-ана және оқушы арасындағы үшжақты жауапкершілік келісімі күшейтіледі. Барлық тараптың тәрбиелік және тәртіптік жауапкершілігі тең дәрежеде бекітіледі.

Мұғалімдерді қорғау шаралары да күшейеді: педагог мәртебесін бұзғандарға салынатын айыппұлдар өседі, ал физикалық не психологиялық қысымнан қорғауға қосымша кепілдіктер енгізіледі.

Асхат Аймағамбетов атап өткендей, бұл түзетулер президент Қасым-Жомарт Тоқаевтың тапсырмасы мен ұстаздардан түскен көптеген өтініштердің негізінде дайындалған. Қазір заң жобасы Үкімет қарауына жолданды.