Президент Қасым-Жомарт Тоқаевтың Жарлығымен Жаслан Мәдиев ҚР Премьер-Министрінің орынбасары – жасанды интеллект және цифрлық даму министрі болып тағайындалды.

Бұған дейін ол Цифрлық даму, инновациялар және аэроғарыш өнеркәсібі министрлігін басқарған еді. Жуырдағы қайта құрудан кейін ведомствоның бір бөлігі Ғылым және жоғары білім министрлігіне берілді. Ал жаңа министрлік жасанды интеллект пен цифрлық технологияларды дамытуға басымдық алды.

Жаслан Мәдиев 1983 жылы Алматыда туған. Әл-Фараби атындағы ҚазҰУ-ды, Колумбия университетін және Массачусетс технологиялық институтын (MIT) тәмамдаған. Еңбек жолын 2004 жылы «Альянс Банкте» бастаған. Кейін «Самұрық-Қазына», Kazyna Capital Management, Қазақстанның Даму банкі және «Қазақстан темір жолы» құрылымдарында жетекшілік қызметтер атқарды. 2019–2020 жылдары Ұлттық экономика вице-министрі болды, одан кейін Стратегиялық жоспарлау және реформалар агенттігі төрағасының орынбасары қызметін атқарды.

2022 жылы Цифрлық даму бірінші вице-министрі, кейін Binance Kazakhstan басшысы болды. 2024 жылдың мамырында Цифрлық даму, инновациялар және аэроғарыш өнеркәсібі министрі болып тағайындалды.

18 қыркүйекте Мемлекет басшысы Жасанды интеллект және цифрлық даму министрлігін құру туралы шешім қабылдады. Бұл бастама 8 қыркүйектегі Жолдауда жарияланған «Цифрлық кодексті» жедел қабылдау және цифрландыру мен жасанды интеллектке жауапты жеке мемлекеттік орган құру жөніндегі тапсырманың жалғасы болды.

Енді Мәдиев елдің жасанды интеллект саласындағы стратегиялық жобаларына, деректерді қорғауға және цифрлық экономиканы дамытуға тікелей жетекшілік етеді.