Мемлекет басшысы Қасым-Жомарт Тоқаев Қытайдың Мәдениет және туризм министрі Сунь Елимен бірге Бейжіңдегі Қазақ мәдени орталығын аралады.
Қытайлық балалар қазақ тілінде сөйлеп, Президентке домбырамен қазақ және қытай әуендерінен попурри орындап берді. Сондай-ақ бейжіңдік оқушыларға арналған киіз басу шеберлік сабағы ұйымдастырылды.
Тоқаевқа қазақ тілі, музыка және шығармашылық кабинеттері, кітапхана мен көрме залдары таныстырылды. Көрмеде сақ дәуірінен ХХ ғасырдың басына дейінгі қазақ тарихын қамтитын жәдігерлер қойылған.
Ақорданың хабарлауынша, экспозиция бес бөлімнен тұрады: археология, зергерлік өнер, қару-жарақ шеберлігі, музыкалық аспаптар және этнография. Ал кітапхана қорында қазақ, қытай, орыс және ағылшын тілдеріндегі мыңға жуық кітап бар.
Айта кетейік, Мемлекет басшысы Қытайдағы Қазақ мәдени орталығының ашылу салтанатына қатысты. Президент бұл бастаманы қос халықтың рухани байланысы үшін аса маңызды деп атап өтті.
Жансулу Садыкова
Бүгін, 15:05
Қоғам