Қазақстанда сыбайлас жемқорлық фактілерін анықтауға көмектескен азаматтарға сыйақы беру жүйесі жұмысын жалғастыруда. Тамыз айында екі тұрғынға жалпы сомасы 730 мың теңге көлемінде қаржылай сыйақы төленген. Бұл туралы Сыбайлас жемқорлыққа қарсы қызметі хабарлады.

Ресми мәліметке сәйкес, бір айдың ішінде 51 сыбайлас жемқорлық қылмысы тіркелген. Оның ішінде 18-і пара беру, 17-і пара алу деректері. Сондай-ақ қызметтік өкілеттікті теріс пайдалану, мүлікті иемдену мен ысырап ету, алаяқтық және делдалдық фактілері анықталды. Тамыз айында сотқа 29 қылмыстық іс жолданған.

Сыйақы қалай төленеді?

Заңға сәйкес, сыбайлас жемқорлық жайлы хабарлаған азаматтарға төмендегідей мөлшерде сыйақы беріледі:

• әкімшілік істер бойынша - 117 960 ₸ (30 АЕК);

• онша ауыр емес қылмыстар - 157 280 ₸ (40 АЕК);

• орташа ауырлықтағы - 196 600 ₸ (50 АЕК);

• ауыр қылмыстар - 275 240 ₸ (70 АЕК);

• аса ауыр қылмыстар - 393 200 ₸ (100 АЕК).

Егер пара мөлшері немесе келтірілген залал 1000 АЕК-тен (шамамен 4 млн ₸) асса, сыйақы көлемі соманың 10 пайызын құрайды, бірақ 15,7 млн теңгеден аспайды.

Сонымен қатар, хабарлаушы азаматтың жеке басы құпия сақталады. Олармен құпиялылық туралы келісім жасалады.

Ал, мемлекеттік қызметшілер заң бойынша жемқорлықты міндетті түрде хабарлауы тиіс болғандықтан, оларға қаржылай сыйақы төленбейді. Тек алғыс немесе грамота беріледі.

Маңыздысы - жалған ақпарат бергендер немесе қылмысқа өзі қатысы бар адамдар ешқандай сыйақы ала алмайды.