Астанада жеті баланың анасы, «Алтын алқа» төсбелгісінің иегері, тұрғын үй кезегінен заңсыз шығарылған. Өз құқығын қорғап, сотқа жүгінген көпбалалы ана қайта кезекке тұрғызылды. Бұл туралы Жоғарғы сот хабарлады.

Әйел 2009 жылдан бері мемлекеттік қызметші әрі көпбалалы ана ретінде тұрғын үй алу кезегінде тұрған. Алайда оның жұбайы мен туысына тиесілі болған, санитарлық және техникалық талаптарға сай келмейтін бұрынғы баспанаға байланысты кезектен алып тасталған.

Көпбалалы ана бірнеше жыл бойы тұрғын үй инспекциясының шешімін сотта даулауға мәжбүр болды. Нәтижесінде, әкімшілік істер жөніндегі кассациялық сот алқасы бірінші және апелляциялық инстанциялардың шешімін заңды деп танып, оның құқығын толық қалпына келтірді.

Жоғарғы соттың мәлімдеуінше, «Алтын алқа» иегерлері, ресми түрде мұқтаж деп танылған және заңды тәртіппен тұрғын үй кезегіне қойылған аналар кезектен шығарылмауы тиіс.