Калифорния штаты, Ранчо Санта-Маргарита қаласының тұрғыны 16 жастағы Адам Рейннің ата-анасы OpenAI компаниясына және оның басшысы Сэм Олтманға қарсы сотқа талап арыз түсірді. Олардың айтуынша, ChatGPT баланы жақындарынан алшақтатып, түбінде қайғылы қадамға итермелеген.

Құжатта чат-бот жасөспірімге суицид әдістерін айтып, тіпті қоштасу хатының үлгісін ұсынғаны жазылған. Сонымен қатар, баланы өз ойларын жасыруға үгіттеп, «жаман ойларын қолдағаны» көрсетілген.

Бұл алғашқы жағдай емес: бұған дейін АҚШ-та басқа да жасанды интеллект құрастырушыларына, соның ішінде Character.AI компаниясына қарсы осындай талаптар қойылған. Сарапшылардың айтуынша, жасөспірімдердің ЖИ-ке шамадан тыс эмоционалды тәуелділігі оларды шынайы ортасынан оқшаулап, психологиялық мәселелерге әкелуі мүмкін.

OpenAI компаниясы отбасыға көңіл айтып, істі зерттеп жатқанын хабарлады. Ұйым өкілдері қауіпсіздік тетіктері қысқа диалогтарда тиімді жұмыс істейтінін, бірақ ұзақ әңгімеде әлсіреуі мүмкін екенін мойындады. 

Рейндер отбасы бірнеше талап қойып отыр: жас шектеуіне байланысты верификация енгізу, ата-ана бақылау құралдарын орнату, суицид немесе өзіне қол жұмсау туралы сөз қозғалғанда автоматты түрде диалогты тоқтату және қауіпсіздік стандарттарына тәуелсіз аудит жүргізу.

Айта кетейік, ChatGPT бүгінде әлемдегі ең танымал жасанды интеллект сервистерінің бірі болып саналады. OpenAI дерегінше, аптасына жүздеген миллион адам пайдаланады. Алайда компанияның өзі де аудиторияның бір бөлігі чат-ботпен «әлеуметтік байланыс» орнатып, бұл қауіпті жағдайға әкелуі мүмкін екенін бұрыннан ескерткен.