Жетісу облысында балық экспорты саласында ауқымды заңбұзушылықтар анықталды. Аймақ прокуратурасының мәліметінше, Еуропаға заңсыз шығарылған өнімнің жалпы құны 80 млрд теңгеден асқан, деп хабарлайды Dala Media.

Тергеу барысында бірқатар экспорттаушылардың өздеріне 20-дан астам фирма ашып, ешқандай квота мен рұқсатсыз жұмыс істегені белгілі болды. Фирмалар құжат жүзінде ғана жеткізілім рәсімдеп отырған. Мәселен, бір компанияға 270 тонна балық аулауға рұқсат берілгенімен, іс жүзінде 5 мың тоннаға жуық өнім экспорттаған. Бұл белгіленген лимиттен 18 есе артық.

Қадағалаушы органның дерегінше, заңсыз айналымға төрт ірі кәсіпорын мен оларға бағынышты құрылымдар қатысқан. Қазір Қылмыстық кодекстің 234-бабы («Экономикалық контрабанда») бойынша сотқа дейінгі тергеу басталды.