Түркістан қаласында жүкті әйелге көмекке келген жедел жәрдем фельдшері қызмет барысында соққыға жығылды. Жүкті әйелдің ішіндег қатты ауырсынуға байланысты дәрігерлер түсік немесе аппендицит болуы мүмкін деп күдіктенген.

Фельдшер науқастың ішін қарап жатқан сәтте әйелдің күйеуі кенеттен ашуға мініп, оның басынан ұрған. Медицина қызметкері қабырғаға соғылып құлағаннан кейін ер адам оны аяғымен теуіп бірнеше рет жарақаттаған.

Зардап шеккен фельдшер бірден ауруханаға жеткізілді. Түркістан қалалық орталық ауруханасының бас дәрігері Бекзат Берденовтің айтуынша, ол жабық бас-ми жарақатын, ми шайқалуын және көз маңы жарақаттанған. Қазіргі таңда жағдайы орташа ауыр деп бағалануда, фельдшер стационарда шамамен екі апта жатады.

Жедел жәрдем станциясы еңбек инспекциясына жүгінгенімен, полицияға арыз түспеген. Себебі зардап шеккен медицина қызметкері шабуыл жасаған азаматпен татуласқан.