1 қыркүйек Тараз қаласында жасөспірімдер арасындағы қанды төбелеспен аяқталды. 14 жастағы жасөспірім пышақ жарақатынан көз жұмды. Жамбыл облыстық полиция департаментінің мәліметінше, күдікті жасөспірім оқиға орнынан ізін суытпай ұсталып, уақытша ұстау изоляторына қамалды. Қылмыстық іс ҚР Қылмыстық кодексінің 99-бабы («Адам өлтіру») бойынша қозғалды.

Бұл соңғы күндері тіркелген жалғыз жағдай емес. Алматыда әлеуметтік желілерде тараған видеода жасөспірім бейтаныс баланы жерге қатты лақтырғаны анық көрінеді. Салдарынан бала сүйектері сынған. Бұл дерек бойынша полиция қасақана орташа ауырлықтағы дене жарақатын келтіру бабымен қылмыстық іс қозғады.

Ал Астанада 6 жастағы бала жұртты шошытты. Аулада ойнап жүрген бала пышақ алып, қыз балаға «футболды әділ ойнамадың» деп қоқан-лоққы жасаған. Абырой болғанда, басқа балалар араласып, пышақты тастауға көндірген. Бүлдіршіннің ата-анасы «баланы дұрыс тәрбиелемегені үшін» әкімшілік жауапкершілікке тартылды.

Бұл оқиғалар қоғамды алаңдатып отыр. Неге балалар арасындағы қатыгездік пен агрессия күшейіп барады? Бұған ең алдымен отбасы тәрбиесі әсер ете ме, әлде интернет пен ойындардың ықпалы басым ба?

❓Сіз қалай ойлайсыз?