Президент Қасым-Жомарт Тоқаев халыққа арнаған Жолдауында Қазақстанның энергия саласындағы ұзақмерзімді стратегиясына тоқталды. Мемлекет басшысы «жасыл» энергетиканы дамыту жоспарымен қатар, атом энергетикасын қолға алудың маңызын ерекше атап өтті.
«Алдағы бес жылда қуаты 6,3 гигаватт болатын жасыл энергия нысандары іске қосылады. Бірақ біздің түпкі мақсат – тек қуат көздерін әртараптандыру емес, елдің тұрақты дамуын қамтамасыз ету. Осы тұрғыда ядролық энергетиканың рөлі айрықша», – деді Тоқаев.
Президенттің айтуынша, Алматы облысында
«Росатоммен» бірге алғашқы атом электр станциясының құрылысы басталды. Алайда бұл жеткіліксіз. «Екінші, тіпті үшінші атом электр станциясының құрылысын қазірден бастап жоспарлай беруіміз керек», – деді ол.
Сонымен бірге Мемлекет басшысы Қытаймен атом саласындағы стратегиялық әріптестік орнатылғанын және Қазақстан барлық жетекші компаниялармен ынтымақтастыққа дайын екенін жеткізді.
Тоқаев көмір энергетикасын да озық технологияларды пайдалану арқылы экологияға зиянсыз дамыту қажет екенін айтты.
DALAMEDIA admin
Бүгін, 19:01
Әлем