Президент Қасым-Жомарт Тоқаев халыққа арнаған Жолдауында елдің әлеуметтік саясатына түбегейлі өзгерістер қажет екенін айтты. Оның сөзінше, жеңілдіктер мен төлемдердің ретсіз көбеюі елдің дамуын тежеп отыр.
«Мемлекеттің көз алдындағыдан басқаны көрмей, бәріне көне беретін әлеуметтік саясаты жүзден астам түрлі жеңілдіктің пайда болуына әкеп соқтырды. Осыны пайдаланатын “көмек қолын” созғыштар да көбейді. Біз әлі күнге дейін бұрынғы КСРО қақтығыстарына қатысқандарға төлем жасап келеміз. Ал КСРО-ның ыдырағанына 35 жыл өтті, бірақ ардагерлер барған сайын “жасарып”, көбейіп барады», – деді Президент.
Мемлекет басшысы әлеуметтік төлемдерді қолдан көбейту – мектеп, аурухана, жол және өзге де инфрақұрылымға жұмсалуы тиіс қыруар қаржының босқа кетуі екенін атап өтті.
Сонымен қатар, Тоқаев «толық емес отбасы» санатының енгізілуі ажырасулардың күрт өсуіне себеп болғанын сынады.
«Осылайша, біз өзіміз жалқаулық пен масылдыққа жол беріп отырмыз. Әр отбасы мүшесі әлеуметтік көмек алатын болса, жұмыс істеудің қажеті қанша?» – деді ол.
Президент демография және еңбек нарығындағы үрдістерді терең талдап, ұзақ мерзімге бағытталған шешімдер қабылдау маңызды екенін айтты. Ол Стратегиялық жоспарлау және реформалар агенттігінің базасында Демографиялық үдерістерді талдау және болжау орталығын құруды тапсырды.
Бұдан бөлек, зейнетақы жүйесінің қаржылық тұрақтылығын қамтамасыз ету, халықтың қаржылық сауаттылығын арттыру, сондай-ақ «AMANAT» партиясы ұсынып отырған «Қарызсыз қоғам» жобасын жалғастыру қажеттігін атап өтті.
«Түпкі мақсат – халықтың қарызын азайту ғана емес, азаматтардың табысының тұрақты болуын қамтамасыз ету», – деді Қасым-Жомарт Тоқаев.
DALAMEDIA admin
15
0