4 қыркүйекте Парижде өткен «Қайсарлар коалициясы» саммитінде 30-дан астам мемлекеттің көшбасшылары бас қосты. Күн тәртібіндегі басты мәселе - Украина қауіпсіздігін қамтамасыз ету.

 

Франция президенті Эммануэль Макронның мәлімдеуінше, 26 мемлекет Украинаға әскер немесе әскери ресурстар бөлуге дайын.

Макронның айтуынша, бұл әскерлер майдан шебіне бармайды. Олар тек соғыс тоқтаған соң немесе бейбіт келісім жасалғаннан кейін белгілі аймақтарға орналастырылады.

Әскерін жіберуге келісім бергендер арасында - Германия, Италия, Канада, Австралия және басқа да елдер бар.

Бірақ:

• Польша әскер жібермей, Жешув қаласындағы логистикалық хаб арқылы қолдау көрсетуді жөн көрді.

• Италия тек оқыту мен мониторингке қатыспақ, бірақ Украина аумағынан тыс жерде.

• Румыния да осыған ұқсас шешім қабылдады.

Украина президенті Владимир Зеленский мұны «жеңіс» деп атап, 26 елдің қолдауы ел әскерін ұзақ мерзімге күшейтіп, қару-жарақ өндірісін арттыруға мүмкіндік береді деді.

Бұл жердегі нешізгі ұстаным - Вашингтонның рөлі. АҚШ президенті Дональд Трамп Еуропаның бастамасын қолдайтынын жеткізді, бірақ америкалық әскерді орналастыруға тікелей келісімін берген жоқ. Оның басты талабы - Ресей мен оның одақтастарына санкцияларды күшейту және Еуропаның ресейлік мұнайдан толықтай бас тартуы.