Қазақстанның даңқты чемпионы, әлемге «GGG» атымен танылған Геннадий Головкин Халықаралық бокс даңқ залына (IBHOF) ресми түрде ұсынылды. Бұл жаңалық оны тек Қазақстан ғана емес, бүкіл әлемдік спорт қауымдастығының назарында тағы бір мәрте ерекше тұлға ретінде танытты.

Әдетте Залға жыл сайын ерлер мен әйелдер арасынан үш боксшыдан және бокс өнерінің дамуына үлес қосқан бапкерлер, төрешілер, журналистер секілді тұлғалар таңдалады.

Биыл Головкинмен бірге америкалық Вернон Форрест пен ирландиялық Стив Коллинз үміткерлер қатарында. Әйелдер арасынан жапондық Наоко Фудзиока, неміс спортшысы Кристина Хаммер және мексикалық Джеки Нава ұсынылған.

Үміткерлерді іріктеу барысында спорт тарихшылары мен әлемнің беделді журналистері дауыс береді. Қорытындысы биылғы желтоқсан айында жарияланып, ресми салтанат 2026 жылдың 11–14 маусым күндері АҚШ-тың Канастота қаласында өтеді.

Геннадий Головкин – заманауи бокстың ең атақты есімдерінің бірі. Ол кәсіпқой рингте орта салмақта ұзақ жылдар бойы чемпиондық белбеулерді иеленіп, талай мықтыларды жолынан тайдырды. Ал әуесқой боксшылар қатарында әлем чемпионы атанып, 2004 жылғы Афина Олимпиадасының күміс жүлдегері болды. Соңғы жекпе-жегін ол 2022 жылдың қыркүйегінде Сауль «Канело» Альвареспен өткізген еді.

Бүгінде Головкин спорттағы жаңа миссиясын жалғастырып жүр. Ол Қазақстан Ұлттық Олимпиада комитетін басқарумен қатар, World Boxing халықаралық федерациясының Олимпиадалық комиссиясына жетекшілік етеді.