Бразилия Жоғарғы соты бұрынғы президент Жаир Болсонаруды мемлекеттік төңкеріс жасауға талпынғаны үшін айыпты деп танып, 27 жыл 3 айға бас бостандығынан айырды. Бұл - ел тарихында тұңғыш рет экс-президенттің мұндай қылмыс үшін сотталуы.

Бес судьяның үшеуі айыптау үкімін қолдаса, біреуі қарсы дауыс берді, тағы бірі дауыс беруден бас тартты. Мұндай шешім үкімді қайта қарауға және түпкілікті шешімді 2026 жылғы президенттік сайлауға таяу қабылдауға мүмкіндік қалдырады.

70 жастағы саясаткерге бірнеше айып тағылды: қарулы қылмыстық топқа қатысу, демократияны күшпен құлатуға әрекет ету, мемлекеттік төңкеріс ұйымдастыру, мемлекеттік мүлік пен мәдени құндылықтарға зиян келтіру. Белгіленген жазаның 24 жыл 9 айы қатаң режимдегі түрмеде өтелмек.

Қазіргі таңда Болсонару сот талаптарын бұзғаны үшін үй қамағында отыр. Жоғарғы соттың мәліметінше, ол 2022 жылдың желтоқсанында президент Луис Инасиу Лула да Силва мен вице-президент Жералду Алкминге қастандық жасау жоспары туралы білген.

Оған қатысты ресми айыптауды бразилиялық полиция 2024 жылдың қарашасында жариялаған еді. Болсонару 2019–2023 жылдары ел президенті қызметін атқарды. 2023 жылдың қаңтарында оның жақтастары сайлау жеңілісіне келіспей, ел астанасы Бразилияда жаппай тәртіпсіздік ұйымдастырып, мемлекеттік ғимараттарды басып алмақ болды. Полиция акцияны күшпен басқан.