Бүгін Сенатта атышулы істің төңірегіндегі ең өзекті сұраққа нүкте қойылды. Қаржы мониторингі агенттігі төрағасының орынбасары Жеңіс Елемесовтің айтуынша, Перизат Қайраттың артында ешқандай ықпалды «тұлғалар» тұрмаған. Ол барлық әрекетті өзі жасаған, жанында тек анасы болған.

Еске салайық, 2024 жылдың қарашасында Перизат Қайратқа су тасқынынан зардап шеккендерге жиналған 1,5 млрд теңгені иемденді деген айып тағылды. Кейін оған Палестинаға көмекке бағытталған қаражатты жымқыру фактілері қосылды. Тергеу дерегіне сәйкес, келтірілген жалпы залал 3,5 млрд теңгеден асты.

Қаржы Мониторингі Агенттігінің мәліметінше, ұрланған ақшаға Астанада элиталық пәтерлер, қымбат автокөліктер және сәнді бұйымдар сатып алынған.

2025 жылдың шілдесінде сот Перизат Қайратты 10 жылға бас бостандығынан айырды. Оның анасы 7 жылға сотталды. Сондай-ақ, мүліктерін тәркілеу және жәбірленушілерге өтемақы төлеу туралы шешім қабылданды.

Қоғамда ең көп талқыланған сұрақ - ешқандай ресми қызметі не тәжірибесі жоқ адамның осынша ірі соманы қалайша иемденгені. Сот барысы жабық өткендіктен, түрлі жорамалдар тарады. Көпшілік «Перизат Қайрат жалғыз емес, оның артында ықпалды тұлға тұр» деген пікірде болды.