Түркістан облысында білім саласындағы ірі көлемдегі қаржы жымқыру ісі бойынша сот үкімі шықты. Шардара аудандық білім бөлімінде болған бұл қылмыстық іс елде үлкен резонанс тудырған еді.

Сот алдында барлығы 15 адам жауап берді. Олардың арасында бөлім басшысы да, бухгалтерлер де бар.

Басты айыпталушы – білім бөлімі басшысы Ақшагүл Бердиәлива 10 жылға бас бостандығынан айырылды. Сегіз бухгалтер 7 жылға сотталды. Қалған айыпталушыларға шартты жаза, амнистия немесе кішкентай балалары бар аналарға жаза өтеуді кейінге қалдыру жазасы тағайындалды.

Сот шешімімен мемлекет кірісіне шамамен 20 нысан тәркіленді. Олардың қатарында үйлер, пәтерлер және зергерлік дүкен де бар. Дегенмен келтірілген шығын толық өтелген жоқ: әр сотталушының үлесіне 22 млн теңгеден 200 млн теңгеге дейінгі қарыз жүктелді.

Үкім жарияланған сәт эмоцияға толы болды – сот залында айыпталушылардың туыстары көз жасын тыя алмады. Бірқатар сотталушы апелляцияға дайындалып жатыр. Тергеу бір жылға жуық уақытқа созылып, 730 томнан тұрған.