Ұлттық банк ұлттық валютаның дизайнын кезең-кезеңімен жаңартуды жалғастырып жатыр. Алдағы уақытта қазақстандықтар жаңа үлгідегі ақша купюраларын қолына алады.

2025 жылдың төртінші тоқсанында айналымға 500 теңгелік жаңа банкнот шығарылады. Ал 2026 жылы ең ірі номинал – 20 000 теңгелік купюра қолданысқа енгізілмек.

Жаңа банкноттардың дизайны «сақ стилінде» орындалған. Ежелгі өрнектер мен бейнелер қазақ орнаментінің негізін құрап, көшпелі мәдени мұрадан қазіргі Қазақстанға дейінгі сабақтастықты айшықтайды.

Жаңартылған купюралар күшейтілген қорғаныс элементтерімен және заманауи көрінісімен ерекшеленеді. 500 теңге күнделікті қолданысқа ыңғайлы болса, 20 000 теңге әмияндағы ең ірі және салмақты банкнот болмақ.

Барлық банкноттарды толықтай жаңарту идеясы 2024 жылдың басынан бері талқыланып келеді. Бұл жұмыс кезең-кезеңімен жүргізілуде: 2023 жылы қазақстандықтар 5000 теңгенің жаңа үлгісін алды, 2024 жылы – 10 000 және 2000 теңгелік купюралар шығарылды. Ал 2025 жылдың көктемінде 1000 теңгелік банкнот қолданысқа енгізіледі.