Вьетнамда Әсем есімді қазақстандық қыз жоғалып кетті. 6 наурыздан бері Хошимин қаласында жүрген 26 жастағы бойжеткенмен байланыс үзілген. Қыздың әпкесі сіңлісінен хабар ала алмай, әлеуметтік желі арқылы жұрттан көмек сұрап, видео жариялаған,-деп хабарлайды «Dalamedia» ақпараттық порталы.

Туыстарының айтуынша, Әсем Ханой қаласына ұшып барып, Қазақстан елшісімен кездесуді жоспарлаған. Алайда әуежайға шамамен 20 шақырым қалғанда ол кенеттен байланыс үзілген. Жақындарының сөзінше, жоғалар алдында қыз қатты алаңдап жүргенін айтып, өзін біреулер аңдып жүргенін жеткізген.

Бұл жағдайға қатысты Қазақстанның Сыртқы істер министрлігі де пікір білдірді. Ведомство мәліметінше, еліміздің Вьетнамдағы елшілігі жоғалған азаматшаның туыстарымен байланыс орнатып, жергілікті құзырлы органдармен бірге оның жүрген жерін анықтау бағытында жұмыс жүргізіп жатыр. Министрлік бұл істі өз бақылауына алғанын хабарлады.

Бұған дейін туыстары Әсемнің Қазақстанға қайтпақ болғанын айтқан. Алайда әуежайдағы таблодан өз рейсін таппағаннан кейін ол абдырап қалған. Жақындарының айтуынша, сол кезде қыз екі тәулікке жуық ұйықтамаған әрі қатты қорқып жүргенін айтып, біреулер өзін бақылап жүргенін жеткізген.

Отбасының мәліметінше, соңғы банктік операция 6 наурыз күні сағат 15:08-де тіркелген. Бұл кезде такси қызметіне төлем жасалған. Сондай-ақ жоғалар алдында Әсемнің америкалық әйелмен бірге түскі ас ішкені белгілі болған. Туыстарымен сөйлескен кезде оның сөзі түсініксіздеу естіліп, жақындары қыздың біртүрлі күйде болғанын байқаған.

Жақындарының айтуынша, Әсем сегіз-тоғыз жылдан бері жалғыз өзі саяхаттап жүрген. Алайда бұған дейін мұндай жағдай болмаған.

Отбасы Вьетнамдағы Қазақстан консулына жүгінген. Бірақ олардың айтуынша, демалыс күндеріне байланысты ресми рәсімдер тек дүйсенбі күні басталмақ. Қазір туыстары Вьетнамда жүрген немесе қыздың қайда екені туралы қандай да бір мәлімет білетін адамдардан хабарласып, іздеуге көмектесуді сұрап отыр.