Атырау облысында із-түзсіз жоғалған отбасыға қатысты тың мәліметтер белгілі болды. Тергеуге жақын дереккөздердің айтуынша, отбасы мүшелері жоғалғаннан кейін оларға тиесілі SIM-карталар белгілі бір уақыт аралығында белсенді қолданылған.

Атыраулық IT-маман жүргізген талдау нәтижесінде SIM-карталардың орналасқан жері Өзбекстан аумағында тіркелгені анықталған. Сондай-ақ WhatsApp мессенджеріне тәулігіне бірнеше рет кіру фактілері тіркеліпті. Ресми деректер бойынша, жоғалған отбасы Қазақстан шекарасын заңды түрде кесіп өтпеген.

Мамандардың болжамынша, Түркістан облысы аумағында Өзбекстанға заңсыз өтуге мүмкіндік беретін бейресми жолдар болуы ықтимал.

Туыстарының айтуынша, қараша-желтоқсан айларында отбасы мүшелерінің зейнетақы төлемдері алынған. Сонымен қатар WhatsApp арқылы үйдегі малдың сатылғаны туралы хабарламалар жіберілген. Барлық хат-хабарлар Наурыз Мұқанғалиевтің атынан жазылған.

Зерттеу жүргізген хакер мемлекеттік ақпараттық жүйелерге қол жеткізбегенін, тек ашық дереккөздер, SIM-карталардың белсенділігі және байланыс операторлары ұсынған мәліметтерге сүйенгенін мәлімдеді. Ол бұл іске қатысы болуы мүмкін нақты бір күдіктінің бар екенін де атап өтті. Себебі SIM-карталар әлі күнге дейін пайдаланылып жатыр.