12 желтоқсаннан бастап Отбасы банк пластикалық және реконструктивті операцияларға арналған біржолғы зейнетақы төлемдеріне өтінім қабылдауды тоқтатты. Мамандардың сөзінше бұған басты себеп бұл бағыттағы сұраныстың аномальды өсуі. Ал, бұдан бұрнын стоматология мен офтальмологияға өтінім беру шектелген кезде, азаматтар жаппай пластикалық операцияларды жаңа мақсат ретінде таңдауға көшкен.

Банк деректеріне сүйенсек, бұған дейін ай сайын шамамен 16 өтінім түсетін. Ал қыркүйекте стоматологияға өтінім тоқтағаннан кейін бұл көрсеткіш 123-ке жеткен. Атап айтсақ, Қазан айында - 1 844, қарашада - 3 878 өтінімге дейін көбейген. Ал желтоқсанның алғашқы сегіз күнінде офтальмология бағыты жабылған соң, пластикалық операцияларға 2 093 өтінім берілген. Бұл - бұрынғы орташа деңгейден 130 есе көп. Желтоқсан айындағы өтінімдердің жалпы сомасы 1,8 млрд теңгеге жеткен.

Отбасы банк төрағасы Ляззат Ибрагимованың айтуынша, күрт өсім зейнетақы қаражатын мақсатсыз пайдалану қаупін көрсеткен. Оның сөзінше, кейбір азаматтар делдалдардың көмегімен ақшаны зейнетақы қорынан шығарып алудың жолын іздеп, пластикалық операцияны желеу ете бастаған. Банк мұндай әрекеттерге жол бермеуі тиіс, өйткені БЖЗҚ қаражаты азаматтардың болашақ зейнетақысы болғандықтан төлемдерді тек нақты бекітілген мақсаттарға ғана қолдануға рұқсат етіледі.

Ал, банкте тіркелген 6 294 өтінім бұрынғы тәртіппен қаралады. Сондай-ақ азаматтар үшін зейнетақы қорындағы артық қаражатын өмірлік маңызды, жоғары технологиялық және қымбат медициналық қызметтерге пайдалану мүмкіндігі сақталады. Олардың қатарында орфандық ауруларды емдеу, радионуклидтік және радиойодтерапия, радиохирургия мен протон терапиясы бар. Бұдан бөлек, жинақтарды баспана алуға, ипотеканы өтеуге немесе Отбасы банк депозитін толықтыруға қолдануға мүмкіндік жалғасады.