Қазақстанда баға тағы да шарықтады. Ұлттық статистика бюросының мәліметінше, 2025 жылдың қыркүйегінде тұтыну бағалары бір айда – 1,1%-ға, бір жылда – 12,9%-ға өсті. Бұл көрсеткіш 2023 жылдың тамызынан бергі ең жоғары деңгей болып отыр.

• Азық-түлік бір айда 0,9%-ға, жылдық есеппен 12,7%-ға қымбаттады. Әсіресе ет (+19,1%), май (+19,5%) және алкогольсіз сусындар (+14,4%) айтарлықтай өскен.

• Азық-түлікке жатпайтын тауарлар бір айда 1,5%-ға, жылына 10,8%-ға қымбаттады. Мұнда бензин бағасы көш бастап тұр (+12%).

• Қызмет көрсету секторында баға бір айда 1%-ға, жылдық есепте 15,3%-ға артқан. Коммуналдық қызметтер ерекше қымбаттады: суық су (+84,3%), газ (+27,7%), жылу мен электр қуаты (+18–19%).

• Қыркүйек айында ең жоғары өсім Ақтөбе облысында тіркелді (+1,7%), сондай-ақ Шымкент пен Павлодар облысында баға айтарлықтай көтерілді.

• Ең төменгі өсім – Қызылорда облысында (+0,8%).

• Жылдық көрсеткіш бойынша Қарағанды облысы алда (+14,9%), ал Қызылорда облысында ең баяу өсім байқалған (+10,9%).

Сарапшылардың айтуынша, бағаның қымбаттауына тек ақша саясаты емес, құрылымдық мәселелер де ықпал етуде. Ескірген коммуналдық инфрақұрылым, тарифтердің өсуі және ұлттық валютаның әлсіреуі негізгі факторлар болып отыр. Қыркүйекте доллар бағамы 550 теңгеге жақындап, импорт тауарларын одан сайын қымбаттатты.