Қазақстандағы тұрғын үй нарығында баға өсімі жалғасуда. Ұлттық статистика бюросының дерегінше, тамыз айында жаңа пәтерлердің құны 1,9%-ға, ал екінші нарықтағы баспананың бағасы 1,2%-ға қымбаттаған.

Жылдық көрсеткіш бойынша өсім одан да жоғары: алғашқы нарықта 11,3%, екінші нарықта 8,8%.

Айлық өсімнің ең жоғары қарқыны Астанада (+3,9%), Ақтауда (+3,7%) және Оралда (+3,1%) тіркелді. Ал жылдық динамикада Павлодар (+25,8%), Алматы мен Қызылорда (+15,3%) көш бастап тұр.

Бүгінде жаңа пәтердің бір шаршы метрі орта есеппен 538,5 мың теңге, ал екінші нарықта – 558,5 мың теңге. Ең қымбат баспана Алматы (692,6 мың тг/м²) мен Астанада (663,7 мың тг/м²), ең қолжетімдісі – Орал, Ақтөбе және Көкшетауда.

Жалдау нарығы да қымбаттап келеді: бір айда 1,7%-ға, жыл ішінде 8,5%-ға өскен. Сарапшылардың айтуынша, әсіресе студенттік қалаларда жаңа оқу жылы басталғанда жалдау ақысы тағы көтерілуі мүмкін.