Қазақстанда офтальмологиялық қызметтерге арналған біржолғы зейнетақы төлемдеріне сұраныс күрт артты. Бірінші кредиттік бюроның мәліметінше, қазан айында көзді емдеуге байланысты 15,4 мың өтініш орындалып, жалпы сомасы 13,3 миллиард теңгеге жеткен. Бұл көрсеткіш қыркүйекпен салыстырғанда шамамен 10 есе, ал биылғы қаңтар–тамыз айларындағы орташа мәннен 73 есе жоғары.

Мамандар мұндай өсімді қыркүйекте стоматологиялық қызметтерге төлем жасауға уақытша тыйым салумен байланыстырады. Себебі көптеген жалған құжаттар мен фиктивті өтініштер анықталғаннан кейін, өтініштердің негізгі легі офтальмология бағытына ауысқан.

Қазан айында көз емдеуге қатысты 730 миллион теңге көлеміндегі 901 өтініш кері қайтарылған. Бұған емнен бас тарту, құжаттардың толық болмауы немесе қаражатты мақсатсыз пайдалану себеп болған.

Сонымен қатар, азаматтардың тұрғын үй жағдайын жақсартуға деген қызығушылығы да жоғары деңгейде сақталуда: қазан айында бұл бағыт бойынша 138,4 мың өтініш орындалып, жалпы сомасы 79,9 миллиард теңгені құрады (саны +7%, сомасы +9%).

Айта кетейік, қыркүйекте Денсаулық сақтау министрлігі стоматологиялық қызметтерге зейнетақы жинақтарын пайдалануға толық тыйым салу туралы ұсыныс енгізді. Бұған дейін «Отбасы банк» дәл осы саладағы өтініштерді қабылдауды уақытша тоқтатқанын хабарлаған еді.