Қазақстанда алкоголь өнімдерін сату ережелері айтарлықтай қатаңдауы мүмкін. Ішкі істер министрлігі спирттік ішімдіктерді тек арнайы лицензиясы бар алкомаркеттерде сатуды ұсынды. Бұл туралы ІІМ басшысы Ержан Саденов Үкімет сағатында мәлім етті.

Министрдің айтуынша, елдегі қылмыстардың басым бөлігі мас күйінде жасалады. Тек соңғы жылы осындай жағдайда 10 мыңға жуық қылмыс тіркелген.

ІІМ ұсынған шаралар мыналар:

• интернет арқылы алкоголь сатуға толық тыйым салу;

• спирттік ішімдіктерді тек мамандандырылған дүкендерде сату;

• лицензия беру тәртібін қатаңдату және олардың санын шектеу.

Сонымен қатар, министрлік барлар мен түнгі клубтарда алкоголь сату уақытына да шектеу енгізуді көздеп отыр. ІІМ дерегінше, мұндай орындарда мас күйінде 1400-ден астам қылмыс, соның ішінде үш кісі өлтіру оқиғасы тіркелген.

Алайда, бұл бастаманы барлық мемлекеттік органдар қолдаған жоқ.

Айта кетейік, Қазақстанда алкогольдің қолжетімділігін азайту бағытындағы шаралар бұрын да қабылданған. 2014 жылдан бері сатылым уақытына, ал 2020 жылдан бастап 21 жасқа толмағандарға сатуға тыйым салынған.