Алматыдағы «Қайрат» – «Реал Мадрид» ойынына байланысты билеттердің қайта сатылуы жөнінде әлеуметтік желілерде көтерілген мәселе Ішкі істер министрлігінің назарынан тыс қалмады.
ІІМ вице-министрі Санжар Әділовтың айтуынша, әзірге полицияға ресми шағым түспеген. Дегенмен, жанкүйерлер тарапынан арыз түссе, құзырлы орган тексеріс жүргізіп, заң аясында тиісті баға беруге дайын.
«Мен мұндай шағымдарды көрген жоқпын. Бірақ егер ресми түрде түссе, міндетті түрде тексереміз және заңға сәйкес шешім қабылдаймыз», – деді ол Мәжіліс кулуарында.
Әлеуметтік желілерде қазақстандық жанкүйерлер ондаған билеттің бір қолға сатылғанын, кейін олар қымбат бағамен қайта ұсынылғанын жазды. ЖСН арқылы сату жүйесі болғанына қарамастан, мұндай жағдайдың алдын алу мүмкін болмаған. Бұдан бөлек, стадионға кіреберісте үлкен кезек пен қысым жасалып, қолында билеті бар көрермендердің өзі ішке кіре алмай қалған.
Ticketon өкілі де мәселені мойындап, қайталама нарық пен жалған билеттердің проблемасы әлі де өзекті екенін айтты.
«Адал жанкүйерлер алаяқтардың әрекетінен зардап шекпеуі тиіс», – деді компания өкілі.
Еске салайық, Алматының Орталық стадионында 30 қыркүйекте өткен тарихи матчқа 20 мыңнан астам жанкүйер жиналды. Дегенмен, «Қайрат» мадридтік «Реалға» 0:5 есебімен жол берді. Ойын нәтижесінен бөлек, бұл кездесу Қазақстан футболының тарихындағы айтулы оқиға болып қалды.
DALAMEDIA admin
8
0