Алматылық «Қайрат» УЕФА Чемпиондар лигасының өз алаңындағы ойындарына, соның ішінде мадридтік «Реалға» қарсы кездесуге билеттер сатылымы туралы мәлімет таратты.

Сатылым 23 қыркүйек күні сағат 17:00-де басталады. Бір қолға екі билeттен артық берілмейді. Ол үшін жеке сәйкестендіру нөмірі (ЖСН) мен паспорт деректері қажет. Билеттерді Ticketon платформасынан, FCKAIRAT.COM сайтынан және Qairat Superapp қосымшасынан алуға болады.

Бағасы 30 мыңнан 250 мың теңгеге дейін. Клубтың атап өтуінше, тарифтер УЕФА-мен келісілген және топтық кезеңдегі барлық ойындарға бірдей қолданылады.

Абонемент иелеріне өз орындарын арнайы шарттармен сатып алу мүмкіндігі беріледі. Ал билеттердің бір бөлігі әлеуметтік квотамен - академия тәрбиеленушілеріне, паралимпиадашыларға және клуб қызметкерлеріне бөлінеді.