Алматыда тарихи «Қайрат» – «Реал» ойынына билеттер небәрі төрт сағаттың ішінде сатылып кетті. 23 мың орындық Орталық стадионға 267 мың адам онлайн- кезекке тұрған. Үш-ақ минутта кезекте 100 мыңнан астам жанкүйер жиналып, сайт та, қосымша да істен шыға берді.

Билет бағасы 30 мыңнан 250 мың теңгеге дейін жетті. Билет сатылымынан түскен табыс 3 млрд теңгеден асып, кейбір қазақстандық клубтардың жылдық бюджетіне пара-пар болды. Бірақ жанкүйерлердің ашуын туғызғаны – билеттердің ресми сатылымы біте салысымен, әлеуметтік желілерде екі-үш есе қымбат бағамен қайта сатыла бастауы. Кейбіреулер тіпті «өз жеке құжатындағы жсн арқылы стадионға өткіземіз» деп жар салуда.

«Қайраттың» баспасөз қызметі: «Үшінші тұлғалардан алынған билеттер күшін жояды. Мұндай билет иелері стадионға кірмейді», – деп мәлімдеді. Алайда виртуалды кезекте сағаттап отырып, билетке қол жеткізе алмаған жанкүйерлер бұл ережеге көне ме? Ойын өтетін күні билетті сатушылар мен алушылар стадионға қаптап келіп, сағаттап кезек қылмасына кім кепіл?

Ия, тіпті билет сатылымына қатысты хаосқа шетел де назар аударды. Испандық басылымдар Алматыдағы билеттерді «тым қымбат» деп бағалап, 400 еуроға дейін жеткенін жазды. Бұл Еуропаның өзіндегі кейбір Чемпиондар лигасының топ-матчтарынан да қымбат екенін айтқан.

Мбаппе, Винисиус, Беллингемд . Әлемдік деңгейдегі жұлдыздарды көруге деген құштарлық түсінікті. Десе де, тарихи футбол ойынын көрудің орнына - жанкүйерлер әзірге істен шыққан жүйе, жүйкесін тоздырған кезек пен пайда қуған алыпсатарларды ғана байқады.