Қазақстан Президенті Қасым-Жомарт Тоқаев 3 қыркүйек күні Бейжіңде өткен ауқымды әскери шеруге қатысты. Шара Екінші дүниежүзілік соғыстың аяқталуы мен Жапонияның тізе бүккеніне 80 жыл толуына арналды.

Салтанатты шара Астана уақытымен таңғы 6:20-да басталып, 70 минутқа созылды. Тяньаньмэнь алаңы бұл күні нағыз әскери сахнаға айналды. 10 мыңнан астам Қытай халық-азаттық армиясының сарбазы сап түзеп өтті, жүздеген әскери техника көрсетілді. Ал әуеде заманауи қару-жарақ үлгілері жұрт назарына ұсынылды. Оқиғаны 50 мыңға жуық көрермен тамашалады.

Шеруге 26 елдің басшылары мен үкімет өкілдері жиналды. Әлемдік саясат үшін бұл - тарихи сәт. Өйткені алғаш рет бір алаңда ҚХР Төрағасы Си Цзиньпин, Ресей президенті Владимир Путин және КХДР басшысы Ким Чен Ын бірге көрінді. Алайда көптеген Батыс елінің өкілдері шараға қатысудан бас тартты.

Бұл уақытта Вашингтонда шеру үлкен резонанс тудырды. АҚШ президенті Дональд Трамп Си Цзиньпинді, Путинді және Ким Чен Ынды «АҚШ-қа қарсы астыртын келісімде» деп айыптады.