Қазақстан азаматтарына енді дайын құжатты алу үшін Халыққа қызмет көрсету орталығына (ХҚКО) қайта барудың қажеті жоқ. Себебі құжаттарды үйге жеткізу қызметі іске қосылды. Бұл туралы «Азаматтарға арналған үкімет» мемлекеттік корпорациясы мәлімдеді.

Жаңа сервис «Халыққа қызмет көрсету бөлімінің менеджері» пилоттық жобасы аясында енгізіліп, бүгінде елдің барлық орталықтарында қолжетімді.

Өтініш беруші азаматқа құжатты үйге жеткізу ұсынылады. Ол үшін мекенжайды көрсету және төлемді кез келген банктің мобильді қосымшасы арқылы QR-кодпен жасау жеткілікті. Құжат дайын болған кезде азаматқа 1414 нөмірінен SMS-код келеді. Курьер алдын-ала хабарласып, жеткізу уақытын келісіп, құжатты табыстаған кезде жеке куәлікті және кодты тексереді.

• Астана, Алматы, Шымкент қалаларында — 1 990 теңге

• Өңірлерде — 1 000 теңге

Қазіргі таңда 15 түрлі мемлекеттік құжатты үйге жеткізу қарастырылған. Оның ішінде:

• туу және қайтыс болу туралы куәліктер;

• некені бұзу туралы куәлік;

• туу, неке және ажырасуға қатысты мұрағаттық анықтамалар;

• білім туралы құжаттардың көшірмелері;

• акт жазбаларын қалпына келтіру;

• ресми құжаттарды апостильдеу.

Жеткізу қызметін тек өтініш берген кезде рәсімдеуге болады. Ал оның барысын «ХҚКО» мобильді қосымшасындағы «Құжаттарды жеткізу» бөлімінен бақылауға мүмкіндік бар.

Мемлекеттік корпорация бұл жаңашылдық азаматтардың уақытын үнемдеп, құжат алу процесін анағұрлым ыңғайлы әрі қауіпсіз ететінін атап өтті.