Қазақстанда салынып жатқан алғашқы атом электр станциясына атау беру конкурсына ел азаматтары ерекше белсенділік танытуда. Атом энергиясы агенттігінің төрағасы Алмасадам Сәтқалиевтің айтуынша, бүгінгі күнге дейін 20 мыңнан астам ұсыныс келіп түскен.

Оның сөзінше, ұсынылған атауларды шартты түрде үш топқа бөлуге болады. Біріншісі – географиялық нұсқалар. Мәселен, «Балқаш», «Іле», «Үлкен», «Мойынқұм» атаулары жиі кездескен. Екінші бағыт – ұлы тұлғалардың есімдері. Олардың қатарында академик Шафик Чокин, Батуров, Абай, Қаныш Сәтбаев бар. Үшінші топ – техникалық және энергетикалық тақырыптарға негізделген атаулар: «Жарық», «Қуат», «Бейбіт», «Энергия», «Атом».

Сәтқалиевтің айтуынша, ұсыныстарды қарауға тарихшылар, этнографтар, уран саласының мамандары, блогерлер мен қоғам белсенділері қатысатын арнайы комиссия жұмылдырылған. Барлық идея жиналған соң, байқау қорытындысы жарияланбақ.

Бас жүлдегер бір адам болуы міндетті емес. Таңдалған атаудың бірнеше авторы болса, олардың барлығы да тең дәрежеде жеңімпаз деп танылып, сертификатқа ие болады. Сонымен бірге, олардың есімдері еліміздің алғашқы АЭС тарихына енгізіледі.

Айта кетейік, аталған станцияның құрылысы тамыз айында Алматы облысы Үлкен ауылы маңында басталған болатын. Жобаның жүзеге асу мерзімі шамамен жеті жылға созылады деп күтілуде.