Алматы облысында 19 жастағы сарбаз қайтыс болды. Әскери бөлімнің ресми мәліметінше, ол өз-өзіне қол жұмсаған. Алайда марқұмның отбасы бұл нұсқаға сенбей отыр.
Қайғылы жағдай 17 қыркүйекте Матибұлақтағы №01098 әскери бөлімінде болған. Қызметін өтеп жүрген Дінмұхаммед Шынарбекті туыстарына «асылып қалған» деп хабарлаған. Бірақ оның жақындары бұған күмән келтіреді.
Марқұмның әпкесі Еңлік Қалтаеваның айтуынша, Дінмұхаммед әскерге туған егізімен бірге аттанған. Әуелі олар бір бөлімде болған, бірақ ант қабылдағаннан кейін Дінмұхаммедті Матибұлақтағы бөлімге ауыстырған.
«Туған күні 29 тамызда болған еді. 19 жасқа толды. Еңбекқор, мейірімді, арманы көп еді. Біз оның өмірін өз еркімен қиды дегенге сенбейміз. Бейбіт уақытта жастардың қазасы неге тоқтамайды? Шындық пен әділдік керек», – дейді ол.
ҚР ҚК Құрлық әскерлігінің баспасөз қызметі қазір қылмыстық іс қозғалғанын, арнайы комиссия құрылып, оқиғаның мән-жайы тексеріліп жатқанын хабарлады. Сондай-ақ марқұмның отбасына қажетті көмек көрсетілетіні айтылды.
DALAMEDIA admin
Бүгін, 19:01
Әлем