Түркістан облысында туған әкесін аяусыз соққыға жығып, оның өліміне себепші болған ер адам қамауға алынды. Облыстық полиция департаментінің мәліметінше, күдіктімен бірге оның жарына да қатысты қылмыстық іс қозғалды.

Оқиға әлеуметтік желіде тараған бейнежазбадан белгілі болды. Кадрларда егде жастағы азаматты ұлы аяусыз ұрып-соғып жатқаны анық көрінеді. Жәбірленушінің беті қанға боялып, орнынан тұра алмаған сәтте күдікті әйелін шақырып, екеуі бірге қартты сүйреп алып кеткен. Бұл сәтті көрші әйел жасырын түсіріп, көпшілікке жариялаған.

Кейін марқұмның күдіктінің туған әкесі екені анықталды. Жәбірленуші алған жарақатынан қайтыс болған. Осыған байланысты күдіктіге қатысты ҚР ҚК-нің 106-бабы 3-бөлігі бойынша («Жәбірленушінің өліміне әкеліп соққан, денсаулыққа қасақана ауыр зиян келтіру») іс қозғалды. Ер адам қамауға алынып, уақытша ұстау изоляторына жеткізілді.

Ал оның жұбайына қатысты ҚР ҚК-нің 109-1-бабы 2-бөлігінің 3-тармағы («Әлсіз жағдайда немесе тәуелділікте болған адамға қатысты соққы жасау») бойынша тергеу жүргізілуде.

Полицияның хабарлауынша, тергеу барысында барлық қажетті сараптамалар мен процессуалдық шаралар жүргізіледі. Соның қорытындысында күдіктілердің әрекеттеріне құқықтық баға берілмек.

Сонымен қатар, тәртіп сақшылары марқұм тарапынан немесе өзге тұлғалардан бұған дейін зорлық-зомбылық жөнінде шағым түспегенін атап өтті.