15 қыркүйектен бастап қазақстандықтар зейнетақы жинақтарының шекті сомасынан артқан бөлігін стоматологиялық қызметке пайдалана алмайды. Бұл туралы «Отбасы банк» ресми түрде хабарлады.

Банк дерегінше, көрсетілген мерзімге дейін түскен барлық өтініштер бұрынғы тәртіппен қаралып, орындалады. Ал жаңа өтініштердің қабылдануы қашан қайта басталатыны әзірге белгісіз.

Бұл шектеу зейнетақы қорындағы қаражаттың заңсыз пайдаланылуына байланысты енгізіліп отыр. Бұған дейін Қаржы мониторингі агенттігі 200 миллиард теңгенің «стоматологиялық қызмет» деген желеумен негізсіз шығарылғанын мәлімдеген. Тергеу барысында бірқатар жеке клиникалардың жалған құжат рәсімдеп, қаражатты қолма-қол ақшаға айналдыру схемаларына қатысы бар екені анықталған.

Қазіргі таңда аталған деректер бойынша тексерулер жүргізіліп жатыр.