АҚШ-та «Трамптың алтын картасы» деп аталатын жаңа иммиграциялық бағдарлама ресми түрде іске қосылды. Бағдарлама шетел азаматтарына елде тұруға, жұмыс істеуге және кейіннен АҚШ азаматтығын алуға мүмкіндік береді.

Жеке тұлғалар үшін картаның бағасы 1 млн доллар, ал өтінімді өңдеу алымы — 15 мың доллар. Өтінімдер «АҚШ әкімшілігінің ресми веб-сайты» арқылы қабылданып жатыр.

Корпоративтік «алтын картаның» құны — 2 млн доллар + 15 мың доллар алым. Бұл карта компанияларға шетелден мамандарды жедел тәртіппен әкелуге жағдай жасайды. Картаны басқа қызметкерге беру үшін компания картаның құнының 5% мөлшерінде комиссия төлейді. Жыл сайынғы қызмет көрсету алымы — картаның құнының 1% (20 мың доллар).

Бағдарлама аясында жеке тұлғаларға арналған одан да қымбат — 5 млн долларлық «Трамптың платина картасы» әзірленуде.
Оны сатып алған шетелдіктер жылына 270 күн АҚШ-та тұрып, елден тыс тапқан табысына салық төлемейді. Бұл карталардан АҚШ бюджетіне шамамен 1 млрд доллар түседі деп жоспарланып отыр.

АҚШ Сауда министрлігі бағдарлама жоғары білікті, тексерілген мамандарды және 100 млрд доллардан астам инвестицияны елге тартуға бағытталғанын мәлімдеген.

Бағдарлама «АҚШ президенті қол қойған жарлық» аясында жүзеге асуда.