Атырау облысында 23 жастағы Яна Легкодимованың өліміне қатысты сот процесі жалғасып жатыр. Кезекті отырыста прокурор айыпталушылардың бір біріне долдаған смс-терін оқып берді. Хабарламалар мазмұны қылмыстың алдын ала жоспарланғанын айқын көрсетеді.

Яна 2024 жылдың 18 қазанында үйінен шығып, содан кейін із-түзсіз жоғалған. Ол таныс жігіттің қоңырауынан кейін қысқа уақытқа ғана шығуға ниеттеніп, сырт киімін алмай кеткен. Көрген соңғы адамдар оны дәл сол ер адамның көлігінде отырған сәтінде байқапты. Қызы үйге оралмаған соң, іссапардан келген анасы оның заттарын тауып, полицияға жүгінген.

Тергеу нәтижесінде 24 және 25 жастағы екі ер адам күдікті ретінде ұсталды. Тергеу материалдарында олардың бірі қыздың күнделігінде аталғаны анықталған. Айыпталушылардың өз мойындауынша, олар Янаны көлікте буындырып өлтірген, ал денесін Талдықұл ауылы маңындағы Жайық өзеніне тастаған. Қыздың сүйегі тек 2025 жылдың 20 маусымында табылды.

«НеМолчи.kz» қоғамдық қорының хабарлауынша, сотта жарияланған хат алмасуда күдіктілер қылмыстың егжей-тегжейін алдын ала талқылаған. Олар ешқандай куәгер қалдырмай, «мінсіз» қылмыс жасауды көздеген. Қылмыстың ашылуына Янаның анасы тапқан күнделік үлкен рөл атқарған.

Іс материалдарына сәйкес, басты айыпталушы қызды тұншықтырған, ал екіншісі көлік есігін ұстап тұрған. Қаскүнемдер қылмыстан кейін ешқандай өкініш сезінбей, ішімдік ішкен.

Қазіргі уақытта сот отырыстары жалғасуда. Қоғам бұл іске ерекше назар аударып отыр - көпшілік әділ үкім шығарылуын талап етуде.