Атақты ирландиялық аралас жекпе-жек шебері Конор МакГрегор антидопинг ережелерін бұзғаны үшін 18 айға жарыстардан шеттетілді. Бұл туралы UFC ресми мәлімдеме жасады.

Промоушеннің хабарлауынша, спортшы 2024 жылы үш рет - 13 маусымда, сондай-ақ 19 және 20 қыркүйекте допинг-тест тапсырудан бас тартқан. UFC-дің антидопинг бағдарламасына сәйкес, әрбір спортшы өз орналасқан жері туралы нақты мәлімет беруге және күтпеген тексерістерге дайын болуға міндетті. Ал тестен негізсіз бас тарту немесе инспекторларды қабылдамау жеке тәртіп бұзушылық болып есептеледі.

UFC мәліметінше, осы кезеңде МакГрегор жарақатынан кейін қалпына келу процесінде болған және жекпе-жектерге дайындалмаған. Дегенмен ол тергеумен келісіп, жауапкершілікті өз мойнына алған. Сол себепті бастапқыда жоспарланған жазалау мерзімі алты айға қысқартылған.

Осылайша, МакГрегордың шеттетілу мерзімі 2024 жылдың 20 қыркүйегінен басталып, 2026 жылдың 20 наурызына дейін жалғасады.

Бұған дейін спортшы Майкл Чендлермен жекпе-жек өткізуге ниетті екенін және бұл кездесу 2026 жылдың маусым айында, алдын ала болжам бойынша, АҚШ президентінің резиденциясы - Ақ үй аумағында өтуі мүмкін екенін айтқан еді.

Айта кетейік, МакГрегор соңғы рет 2021 жылдың жазында октагонға шығып, Дастин Порьеге жеңілген болатын.

Өткен аптада ұқсас шешім өзбек спортшысы Рамазан Темировқа қатысты да қабылданған. Ол допинг-тест оң нәтиже көрсеткеннен кейін бір жылға жарыстардан шеттетілді.