Алматыда оқу орталығының басшысы жүзден аса ата-ананы алдап, ірі көлемде ақша жымқырғаны үшін сотталды. Тергеу деректеріне қарағанда, күдікті оқу орталығын ашып, әлеуметтік желілер мен интернет арқылы жарнама жасаған. Ата-аналарға балаларын Foundation бағдарламасымен оқытатынын және кейін шетелдік университеттерге түсіретінін айтып уәде еткен. Ақшаны қолма-қол, несие және бөліп төлеу арқылы қабылдаған. Бірақ шетелдегі оқу да, уәде етілген сертификаттарды да бермеген.

Осылайша, барлығы 112 адам алданып, келтірілген шығын көлемі 168 миллион теңгеден асты.

Бостандық аудандық №2 соты айыпталушыны кінәлі деп таныды. Сот отырысында жәбірленушілер мен куәгерлердің айғақтары ұсынылып, жасалған келісімшарттар да оның алаяқтығын дәлелдеді.

Нәтижесінде күдікті 7 жылға бас бостандығынан айырылды. Алайда Конституцияның 30 жылдығына байланысты жарияланған амнистияға сәйкес жазасы қысқартылып, 5 жыл 7 ай болып бекітілді.

Сонымен бірге, ол – 168 миллион теңгеден астам қаражатты жәбірленушілерге қайтаруға міндеттелді.