Қытайдың Шаньдун провинциясында күтпеген жағдай орын алды. Xiaomi SU7 маркалы электромобильдің иесі көлігін үйінің жанындағы тұраққа қойып кеткен. Алайда бейнебақылау камерасынан ол ешкім отырмаған көліктің өздігінен оталып, қозғалғанын байқайды.

Иесі көлікті тоқтату үшін көшеге жүгіріп шыққан. Оқиға сәті түсірілген видео қытайлық әлеуметтік желілерде тез тарап, «автокөлік өздігінен қозғалды» деген хэштегпен қызу талқыланып жатыр.

Көлік иесі дереу Xiaomi компаниясының қолдау қызметіне жүгінген. Мамандар мұны қосымша арқылы іске қосылатын қашықтан басқару функциясымен түсіндірді. Бірақ иесі смартфонды мүлде қолданбағанын айтып, дәлел ретінде бейнежазбаны көрсетті.

Кейіннен кейбір ақпарат көздері иесінің iPhone құрылғысы көліктің қашықтан тұрақтан шығару жүйесін (RPA) өздігінен белсендіруі мүмкін деген болжам жасады. Дегенмен сарапшылар мұндай жүйелердің қауіпсіздік сүзгісінен өтіп, жүргізушісіз қозғалысқа түспеуі тиіс екенін атап өтті.

Xiaomi әзірге ресми қорытынды жариялаған жоқ. Бұл оқиға Қытайда ғана емес, өзге елдерде де «ақылды көліктердің» қауіпсіздігі мен қашықтан басқару сенімділігі жайлы қызу пікірталас тудырып отыр.