Қостанай өңірінде күз аяқ астынан қыспен алмасып, 29 қыркүйек таңында Қостанай мен Рудный тұрғындары ақ ұлпаға оранған көшелерге оянды. Әлеуметтік желілерде қарлы кадрлар тез тарап жатыр.

«Қазгидромет» дерегінше, аймақ солтүстік циклон ықпалына түскен. Түнде ауа температурасы –3 градусқа дейін төмендесе, күндіз +3…+8 шамасында. Қармен бірге тұман, көктайғақ және жылдамдығы 20 м/с-қа дейін жеткен жел соғуда.

Полиция жүргізушілерді жолдың тайғақтығына байланысты жылдамдықты азайтып, арақашықтықты сақтауға шақырды. Ал жаяу жүргіншілерге көшені тек жаяу жүргіншілер өткелінен өту ескертілді.

Синоптиктердің айтуынша, алдағы күндері оңтүстік пен шығыс өңірлерді қоспағанда, еліміздің басқа аймақтарында да қар мен аяз күтіледі.