Түркістан облысында полицейлер заңсыз көші-қонмен айналысқан қылмыстық топтың жолын кесті. Тергеу дерегінше, шетелдіктер Қазақстанға шекара бекеттерін айналып өтіп кіру үшін әр адамнан шамамен 500 мың теңге төлеген.

11 қыркүйек күні топтың төрт ұйымдастырушысы және бірнеше сыбайласы ұсталып, уақытша ұстау изоляторына қамалды.

Олардың үйлерін тінту барысында басқа мемлекеттердің төлқұжаттары, жалған құжаттар, телефондар мен электронды тасымалдаушылар тәркіленді.

Тергеу мәліметінше, қылмыстық топ ТМД елдерінен келген азаматтарға жүйелі түрде заңсыз жолмен Қазақстанға өтуге көмектесіп отырған.

Қазір ұсталғандарға Қылмыстық кодекстің екі бабы бойынша іс қозғалды:

• «Заңсыз көші-қонды ұйымдастыру»,

• «Мемлекеттік шекараны қасақана заңсыз кесіп өту».

ІІМ өкілдері мұндай заңсыз әрекеттерге қатаң тосқауыл қойылатынын атап өтті.