Түркістан облысы Сайрам ауданына қарасты Қарамұрт ауылында жантүршігерлік оқиға болды. Ер адам өз жұбайын балғамен аяусыз соққыға жығып, артынша өзіне қол салған. Қайғылы жағдай үйінде, төрт баласы ұйықтап жатқанда болған.

Көршілерінің айтуынша, таңертең үйдегі сұмдықты алғаш болып балалардың өзі көрген. Олар анасының жансыз денесін байқап, шошып сыртқа жүгіріп, көмекке шақырған. Марқұм әйелдің жасы 45-те еді. Оның қасынан қанға боялған балға табылған, кейін аулада күйеуінің асылып тұрған денесі анықталды.

56 жастағы ер адам қайтыс болар алдында аудиожазба қалдырған. Онда ол әйелін опасыздық жасады деп айыптап, қанды қылмысқа соны себеп қылғанын айтқан. Алайда марқұмның туыстары бұл сөздерді жоққа шығарып отыр. Олардың айтуынша, кеиісінше ер адам жұмыссыз жүрген, жиі ұрыс шығаратын, отбасының берекесін алатын адам болған.

Түркістан облыстық полиция департаменті қылмыстың болғанын растады. Қазір сотқа дейінгі тергеу амалдары жүргізілуде.

Қайтыс болған әйелдің артында төрт бала қалды. Үлкені - 13 жаста, кенжесі - небәрі 4 жаста. Балалар әзірге кәмелетке толмағандарды бейімдеу орталығына орналастырылды.