Қарағандыда 22 жастағы қала тұрғынына қатысты қылмыстық іс сотта қаралады. Ол әлеуметтік желіде жариялаған жазбалары үшін ұлтаралық араздық қоздырды деп айыпталуда. Алғашқы сот отырысы 14 қазанға белгіленген. Істі судья Арғын Құтышев жүргізеді.

Тергеу мәліметінше, биыл жазда күдікті Threads желісінде қазақстандықтарды қорлайтын жазбалар жариялаған. Бұл жазбалар қоғамда үлкен резонанс тудырып, көпшіліктің наразылығына себеп болды.

Оған қатысты ҚР Қылмыстық кодексінің 174-бабы, 1-бөлігі бойынша іс қозғалды. Бұл бап ұлтаралық немесе діни араздықты қоздыруға, ұлттық намыс пен қадір-қасиетті қорлауға бағытталған әрекеттер үшін жауапкершілік қарастырады.

Шілде айында күдікті елден кетуді жоспарлаған деген уәжбен екі айға қамауға алынды. Ұсталар алдында ол көпшілікке арнап бейнежазба түсіріп, кешірім сұраған болатын. Онда қыз өз сөздерінің елдің намысына тиюі мүмкін екенін мойындап, өкінгенін айтқан.

Алайда кейін әлеуметтік желілерде оның Алматыдағы ойын-сауық орындарында жүргені жайлы қауесеттер тарады. Полиция бұл ақпаратты жоққа шығарып, күдіктінің осы уақыт бойы тергеу изоляторында отырғанын растады.

Енді оның кінәлі немесе кінәсіз екеніне сот шешім шығарады.