Қазақстанда қазан айы салқын күндермен басталғанымен, синоптиктер айдың алғашқы онкүндігінде елге мизам шуақтың қайта оралатынын болжайды. Бұл кезеңде тұрғындар алтын күздің соңғы жылы шуақтарына куә болмақ.

Алғашқы онкүндікте оңтүстік пен оңтүстік-шығыста ауа температурасы күндіз +20…+28 °C-қа дейін көтеріледі. Батыста +17…+25 °C, орталықта +15…+23 °C, ал солтүстік пен шығыста +10…+18 °C шамасында болады.

Екінші онкүндікте кейбір өңірлерде аздаған салқын байқалғанымен, қайтадан жылы ауа райы күтіледі. Дегенмен ай соңында қыстың алғашқы ызғары сезіліп, солтүстікте түнгі температура −7…−12 °C-қа дейін төмендейді. Оңтүстікте бұл көрсеткіш −1 °C-қа дейін түсуі мүмкін.

Синоптиктер қазанның екінші жартысында тұман, көктайғақ, қатты жел соғатынын ескертеді. Ал солтүстік өңірлерде алғашқы қар жаууы ықтимал.