Қарағандыда полиция бөлімшесінде жұмбақ жағдайда көз жұмған 23 жастағы әйелдің өліміне қатысты тергеу жүріп жатыр. Оқиға Михайлов полиция бөлімшесінде болған.

Telegram-арна «Патриоттың» мәліметінше, марқұмның төрт жастағы ұлы қалған. Ол еш жерде жұмыс істемеген және учаскелік полиция қызметкерімен таныс болғаны айтылады. Қайтыс болған әйелдің туыстары химико-токсикологиялық сараптама қорытындысын күтуде. Өлім себебі осы зерттеу нәтижесінде анықталмақ.

Ал полиция инспекторы, 36 жастағы ер адам, ес-түссіз күйде ауруханаға жеткізілген. Дәрігерлердің айтуынша, оның жағдайы ауыр болғанымен, қазір өміріне қауіп жоқ.

Еске салайық, оқиға 1 қазанға қараған түні болған. Полиция бөлімшесінен жас әйелдің денесі мен ес-түссіз жатқан полиция қызметкері табылған. Қазір бұл дерек бойынша қылмыстық іс қозғалып, тергеу амалдары жүргізіліп жатыр.

Тергеу органдары әзірге оқиғаның мән-жайын жария етпеді. Әйелдің полиция бөлімшесіне қалай және қандай жағдайда келгені анықталу үстінде.