Ресей президентінің көмекшісі Юрий Ушаковтың хабарлауынша, әңгіме америкалық тараптың бастамасымен өткен. Кездесу барысында халықаралық күн тәртібіндегі негізгі мәселелер қаралды: Таяу Шығыстағы жағдай және Украинадағы қақтығысты реттеу жөніндегі келіссөздер талқыланды.

Ушаковтың айтуынша, Путин Иранға қатысты қақтығысты саяси-дипломатиялық жолмен тезірек шешу жөнінде ұсыныстарын жеткізген. Сондай-ақ ол Парсы шығанағы елдерімен жүргізілген келіссөздердің нәтижесінде қалыптасқан бағаларын бөліскен.

Тараптар Украинадағы жағдайға да тоқталған. Путин АҚШ пен Трамптың делдалдық күш-жігерін оң бағалаған. Әңгіме іскерлік, ашық және конструктивті сипатта өткен.

Сонымен қатар Reuters агенттігі хабарлағандай, Дональд Трамп әкімшілігі әлемдік мұнай бағасының күрт өсуіне байланысты Ресей мұнайына салынған санкцияларды жеңілдету мүмкіндігін қарастырып жатыр.

Трамптың сөзінше, Иранға қарсы соғыс «іс жүзінде аяқталуға жақын». АҚШ әскери операциялары бастапқы жоспарланған мерзімнен әлдеқайда жылдам жүргізіліп жатыр. Бұл шешім Иранға қарсы іс-қимылды аяқтау мақсатында Израиль премьер-министрі Биньямин Нетаньяхумен бірлесіп қабылданады.