Ақтөбеде жасөспірім қол көтерген 71 жастағы қария дәрігерлердің бақылауында жатыр. Қол-аяғындағы жаралар тігіліп, соққыдан кейінгі жүйкелік күйзелісіне байланысты мамандар күнделікті психологиялық көмек көрсетуде.
№1 көпсалалы қалалық аурухана дәрігерлерінің хабарлауынша, қария 2 қараша күні түнгі сағат 01:40 шамасында жедел жәрдем арқылы жеткізілген. Алғашқы тексеру кезінде оның бірнеше жерден жарақат алғаны анықталған.
Бас дәрігер Қадірбек Иманбаевтың айтуынша, пациенттің жағдайы әзірге орташа ауыр:
«Қарияның денесінің бес нүктесінде жарақат бар. Қол-аяғында соққы іздері байқалады. Сонымен қатар қатты шок алған. Қабырғасының сынғаны анықталды. Қазіргі таңда жағдайы тұрақты, барлық қажетті ем-дом жасалып жатыр. Психологтер күн сайын әңгімелесіп, бақылап отыр. Есту қабілеті нашар болғандықтан сұрақтарға әрдайым нақты жауап бере бермейді. Емді ауруханада жалғастырады. Келесі аптада жағдайына қарай учаскелік дәрігерге жіберу мәселесі қаралады», – деді ол.
Еске сала кетейік, Ақтөбеде оқушы өз анасын өлтіріп, әжесін пышақтаған оқиға қоғамда резонанс тудырған еді. Қазір бұл факті бойынша қылмыстық іс қозғалып, тергеу жүргізілуде. Күдікті өз әрекетін мойындағанымен, оқиға себептері әлі жарияланған жоқ.
DALAMEDIA admin
8
0