60 жастағы Гүлнар Қалиеваның айтуынша, ол оқиға кезінде құтқарушыларды көрген, бірақ олар «қарап қана тұрған». Гүлнар өзін, сіңлісі Айнұрды және Ұлдананы жедел жәрдем қызметкерлері шығарып алғанын жеткізді.

Гүлнар ауыр жарақат алған: бас миы шайқалып, саусақтары, бұғана және бірнеше қабырғасы сынған, омыртқасы екі жерден зақымданған. Ол қазір өздігінен жүре алмайды, екі ай бойы арнайы корсет киюі керек. Зардап шеккен әйел ұлы мен көршісінің қарауында.

Қайғылы оқиға ол сіңлісімен ағасының үйіне бара жатқан сәтте болған. Дүкенге кірер алдында қасбет құлап, екі әйел үйінді астында қалған. Кейін құлаған кондиционер 23 жастағы фельдшер Ұлдана Мырзуанға зақым келтірген.

Гүлнардың сіңлісі Айнұр да ауыр халде. Бас сүйегі жарақаттанып, қабырғалары мен омыртқасы сынған. Оның денсаулығы қатерлі ісіктің соңғы сатысына байланысты әлсіреген.

Оқиға болған ғимаратта Жанкелді мен Айгүл бір жыл бұрын пәтер сатып алған. Тұрғындардың айтуынша, үйдің тозығы жеткені жөнінде ешкім ескертпеген. Қасбетте және едендерде жарықтар болған, шатырдан су аққан, ал кей пәтерлердің төбесі құлай бастаған.

Қайғылы оқиғадан кейін аулада қоршаулар орнатылып, қаптамасы құлаған дүкен уақытша жабылды.